Menu
მაღაზიაში ვაჭრობა, 21-ე საუკუნეში, საერთოდ აღარ არის გასაკვირი. მეტიც, ის უკვე რუტინად იქცა და თითქოს იმდენად ვეგუებით ამ ყოველდღიურობას, რომ აღარც ვფიქრობთ მის გადააზრებაზე.
გადავწყვიტე, საკუთარი თავი კრეატიულ ბრძოლაში გამომეწვია და გამეცოცხლებინა მაღაზია ჩემი წარმოსახვიდან — სადაც ვაჭრობა საინტერესო თავგადასავალია.
პროექტში შესულია: სტილი, ლოგო, ფერები, ტიპოგრაფია, სიმბოლოები, კლასიფიკაცია, შეფუთვა, უნიფორმა, საოფისე ეფემერა და წამყვანი ვიზუალი.
ქართული მაღაზიათა ქსელების ინდუსტრიაში, ჩემი აზრით (და იმედს ვიტოვებ, რომ ეს მხოლოდ ჩემი აზრი არ არის), ძალიან დიდი ხმაურია. თითქოს კომპანიები ყვირიან იმ სემანტიკებზე, რომლებიც უთქმელადაც უნდა ჰქონდეს მომხმარებელს: დაბალი ფასები! მაღალი ხარისხი! მეტი აქციები! და ასე შემდეგ...
პროექტის მთავარი გამოწვევა კი სწორედ ამ ხმაურის გარღვევა იყო. თან ისე, რომ შენარჩუნებულიყო ბრენდის სიმარტივე და ელეგანტურობა.
პირველი და უმთავრესი, ვიზუალური იდენტობის შექმნისას, არის სტილი. მის ფორმირებაში განსაკუთრებული ყურადღება ექცევა ფუნდამენტურ სიტყვებს. სწორედ მათზე დაყრდნობით იწყებს სტილი აღმოცენებას. „მიმინოს“ მახასიათებლებს არაერთი სიტყვა შეესაბამება, თუმცა ამ სიტყვებიდან სამი გამორჩეული — მზრუნველი, მარტივი, გემოვნებიანი — აძლევს დასაბამს ბრენდის სტილსა და ვიზუალურ მიმართულებას.
„მიმინოს“ ლოგოზე გამოსახულია თავად ფრინველი — მიმინო.
ლოგო თავს უყრის ბრენდის მახასიათებლებს. მისი მრგვლოვანი და შეკრული ფორმები ეხმიანება მზრუნველობის კონცეფციას.
ის შორს დგას გაბატონებული კონოტაციებისგან მტაცებელი ფრინველის შესახებ, როგორიცაა: მკაცრი მოქმედების ხაზი, ბასრი ფორმები და მტაცებლური გამომეტყველება. მსურდა მეჩვენებინა, რომ მიმინო არის ძლიერი, მაგრამ არა ბოროტი. კეთილი, მაგრამ არა სუსტი.
მისი ძლიერი სილუეტი უზრუნველყოფს სიმარტივეს როგორც გამოყენებაში, ასევე ბრენდის აღქმასა და იდენტიფიკაციაში.
„მიმინოს“ ლოგო ორი განსხვავებული წყობითაა წარმოდგენილი: სიმბოლო ორენოვანი სახელწოდებით და მხოლოდ სიმბოლო.
„მიმინოს“ ვიზუალური იდენტობის ერთ-ერთი პრინციპი სიმარტივეა, რომელიც ფერებზეც აისახა. ბრენდის კომუნიკაცია ორი ფერით შემოიფარგლება — შავი და თეთრი. (#070707 და #FAFAFA)
თეთრი, ოპტიკური თვალსაზრისით, აერთიანებს ყველა ფერს, თუმცა, ამავდროულად, სუფთა და თავისუფალია ყველა ფერისგან.
დანარჩენ ფერებს არა მხოლოდ ესთეტიკური, არამედ გამოყენებითი დანიშნულება აქვს კლასიფიკაციაში.
ტიპოგრაფია იზიარებს ვიზუალური იდენტობის სხვა ელემენტების მახასიათებლებს. „მიმინოს“ შემთხვევაში საუკეთესო არჩევანი შრიფტებს შორის Eurostile აღმოჩნდა (ქართულენოვანი შრიფტის ავტორი — მერაბ გეწაძე), რომელიც აერთიანებს სიმრგვალეებსა და ბასრ დაბოლოებებს. იგი ერთდროულად ძლიერი, მარტივი და მშვიდი შეგრძნების მატარებელია.
გამოყენების თვალსაზრისით. ეს შრიფტი მიზანშეწონილია Display სიტუაციებისთვის (დიდი ზომით გამოყენება) და არ არის გამოყენებადი დიდი მოცულობის ტექსტებისთვის.
„მიმინოს“ ვიზუალურ იდენტობაში ფერებს გამოყენებითი დანიშნულება აქვს (კლასიფიკაციაში). პროდუქცია დავყავი შვიდ დეპარტამენტად, ხოლო საკვები პროდუქტების დეპარტამენტი — თორმეტ ქვეკატეგორიად.
იქიდან გამომდინარე, რომ კლასების რაოდენობა საკმაოდ დიდია, თუმცა ფერების რაოდენობა შეზღუდული (ჰარმონიულობისთვის), დეპარტამენტებში კონკრეტული ფერი გამოყენებულია ფონად, ხოლო ქვეკატეგორიებში, ფონების ნაცვლად, ტექსტები და სიმბოლოები არის გამოსახული განსხვავებული ფერებით.
სამომხმარებლო გამოცდილების მაქსიმალური უტილიზაციისთვის შევქმენი სიმბოლოების სისტემა, რომელიც ფერებთან ერთად იღებს მონაწილეობას მაღაზიის პროდუქტთა კლასიფიკაციაში.
სისტემაში შესულია 18 უნიკალური სიმბოლო, რომელიც მოიცავს როგორც დეპარტამენტებს, ასევე ქვეკატეგორიებს.
შეფუთვის დიზაინში თანადროული სისტემატიურობისა და დიფერენციაციის წარმოსადგენად შევქმენი სპეციალური პატერნები, რომლებიც განსხვავების პარალელურად, თავიანთი მახასიათებლებით ერთ ოჯახში ერთიანდებიან.
უნიფორმის ვიზუალური მიმართულება პასუხობს წინა გვერდებში ნაჩვენებ ფუნდამენტურ მახასიათებლებსა და ელემენტებს: მზრუნველი, მარტივი და გემოვნებიანი.
„მიმინოს“ უნიფორმა არ ცდილობს თავი შეაწყინოს და ყურადღება გაუფანტოს მომხმარებელს დიდი სიმბოლოებითა და წარწერებით. მისი მინიმალისტური დიზაინი, დახვეწილობასთან ერთად, უზრუნველყოფს თანამშრომლების მარტივ იდენტიფიცირებას.
წამყვანი ვიზუალი (სარეკლამო ინდუსტრიაში ცნობილი, როგორც KeyVisual), არის კომუნიკაციის საშუალება, რომელიც ერთი კომპოზიციით მოგვითხრობს ბრენდის შესახებ.
„მიმინოს“ წამყვანი ვიზუალი ხაზს უსვამს ბრენდის განსხვავებულ პოზიციონირებას.
სარეკლამო გრაფიკაში ასახულია მიმინოს კოსმიური ხომალდი, როგორც მეტაფორა საუცხოო და განსხვავებული სივრცისა. მასში ფრენით მილივლივებენ ურიკები — არნახულის სანახავად.
