ჩიორა — საბავშვო ტანსაცმლის მაღაზია

ბრენდინგი და იდენტობის დიზაინი

შესავალი

ერთ დღეს ახალგაზრდა ცოლ-ქმარი, ბექა და მარიამი დამიკავშირდნენ. ჩვენ საკონსულტაციო ზარი ჩავნიშნეთ. აღმოჩნდა, რომ ვესაუბრებოდი გულანთებულ წყვილს, დიდი გეგმებით. ისინი ქმნიან საბავშვო ტანსაცმლის მაღაზიას, რომელიც ბავშვებს იმაზე მეტს შესთავაზებს, ვიდრე უბრალოდ სამოსს. ჩემი მისია კი მათი ბიზნესისთვის ძლიერი ფუნდამენტის აშენება იყო. პროექტის ფარგლებში შევქმენი: ბრენდის სტრატეგია, ბიზნესის სტრატეგია, სახელი, სლოგანი, ბრენდის ნარატივი, ლოგო, წამყვანი ვიზუალი და იდენტობის დიზაინი.

კრეატიული
გამოწვევა

პროექტის მთავარი გამოწვევა იყო განსხვავებულ დისციპლინებში დამოუკიდებლად მუშაობა. ამავდროულად, ბრენდის გადასახედიდან, გამოწვევას წარმოადგენდა ბავშვური სილაღისა და მხიარულების შეზავება კომპეტენტურობასა და პროფესიონალიზმთან.

ბრენდის
სტრატეგია

ბრენდის სტრატეგიის შემუშავება ჩემი სამუშაო პროცესის პირველი და უმთავრესი საფეხურია (რომელიც მრავალ ქვესაფეხურად იყოფა). იგი განსაზღვრავს, თუ რისთვის არსებობს და რაზე დგას ბიზნესი. მასში შედის ისეთი ინტიმური საკითხებიც, რომელიც ფარდის მიღმა უნდა დარჩეს, ბრენდინგის ეტაპობრივი და ნატურალური პროცესის ხელშეუშლელობისთვის. ამ ნაწილში გაგიზიარებთ ბრენდის სტრატეგიის ისეთ კომპონენტებს, რომლებიც შეგვიძლია ღიად ვიცოდეთ.

სახელი

ბრენდის სახელზე ფიქრისას, როგორც ყოველთვის, გონებაში ბევრი კრეატიული ხაფანგი იგება, რომელშიც არავითარ შემთხვევაში არ უნდა ჩავვარდეთ! ჩემი მიდგომა ბრენდის სახელების მიმართ ასეთია — 80% პოლიტიკა, 20% კრეატივი. ბევრი იდეის, ფიქრისა და ხაფანგის შემდეგ, მივედი ბრენდის სახელამდე. ეს არის „ჩიორა“. ჩემი შემუშავებული „ტესტების“ ჩატარების შემდეგ განვამტკიცე სახელის სიცოცხლისუნარიანობა. მისი ერთ-ერთი უპირატესობა საზოგადოებაში უკვე არსებული კონოტაციებია ჩიტი ჩიორას შესახებ. თუ რამდენად შეესაბამება „ჩიორა“ ბრენდის მიზნებსა და იდეალებს, ამას ბრენდის ნარატივში შეიტყობთ.

ბრენდის ნარატივი/
სლოგანი

ჩვენს გულებში ჩიტები ბუდობენ.

ზოგჯერ ისინი გამოკეტილები არიან ამ ბუდეში და არ ვაძლევთ აქედან გამოსვლის საშუალებას. ამ დროს კი ისინი შველას ითხოვენ, რადგან ჩიტი მაშინ ჩიტობს, როცა ლაღად შეუძლია შემოიფრინოს არე-მარე და შემდეგ ისევ თავის ბუდეში დაბრუნდეს.

ჩვენი მისია კი სწორედ ამ ჩიტების გათავისუფლებაა. თავისუფალი ჩიტები გარეთ ლაღად ნავარდობენ, გალობენ და ჭიკჭიკებენ ჩვენს შინაგან სამყაროზე, იმაზე, თუ რა გვახარებს და გვაბედნიერებს.

ჩიტის საამო და ხმაურიანი გალობა ყურადღებას იქცევს და გამოარჩევს ადამიანს სხვებისგან.

ჩიორა — ჩიტი გულის ბუდიდან.

ლოგო

„ჩიორას“ ლოგოში, რა საკვირველია, მსურდა ჩიტის ასახვა. საქმე ისაა, რომ ჩემი მიზანი არ იყო უბრალოდ „ლამაზი ჩიტის“ დახატვა. ასეთი უკვე არაერთ კომპანიას აქვს და თითქოს ყველა ერთმანეთს ჰგავს (თუ ეს ვინმეს ეწყინა, შეგიძლიათ იხილოთ ჩემი „ბოდიში“ ცივი წყლის დაყოლებით).

ამ ლოგოთი ჩემთვის და ჩემი კლიენტისთვის (იმედი მაქვს, თქვენთვისაც) სამუდამოდ შევცვალე პერსპექტივა, რომლითაც ვუყურებ ასო „ჩ“-ს.

ლოგოს დასახატად შევიმუშავე სპეციალური სისტემა, რომელიც ბავშვებსაც კი გაუმარტივებს
ჩიტი ჩიორას დახატვას და კიდევ უფრო დაახლოვებს ბრენდთან.

ჩიორას ლოგო წარმოადგენს ასო „ჩ“-ში ჩახატულ ჩიტს.

კლასები და
სიმბოლოები

„ჩიორას“ პროდუქტები ბიზნესის სტრატეგიის პროცესში ოთხ კატეგორიად დაიყო. სამი ასაკობრივი კლასი: 0-დან 1 წლამდე, 1-დან 4 წლამდე და 4-დან 8 წლამდე. მეოთხე კატეგორია კი ეთმობა საყიდლებს ბავშვის დაბადებამდე („გამოჩეკამდე“). თითოეული კატეგორიისთვის სპეციალური სიმბოლოები შევქმენი.

ფერები

„ჩიორას“ ფერების პალიტრაში ორი ძირითადი, ურთიერთკომპლემენტარული ფერი ფიგურირებს.

წითელი
— ემოციური თვალსაზრისით, ყველაზე ინტენსიური ფერი, რომელიც ასახავს ჩიორას ექსპრესიულ ხასიათს.

მწვანე
— ასახავს „ჩიორას“ ნატურალურობას, როგორც მატერიალურ, ასევე ემოციურ დონეზე.

ტიპოგრაფია

„ჩიორას“ ვიზუალური იდენტობის შრიფტად შევარჩიე FiraGO (ავტორი — აკაკი რაზმაძე). მისი თანამედროვე და მინიმალისტური სტილი ხაზს უსვამს ბრენდის მახასიათებლებს (ბევრი რომ აღარ ვილაპარაკოთ, FiraGO დახვეწილი და ლამაზი შრიფტია).

წამყვანი
ვიზუალი

წამყვანი ვიზუალი (სარეკლამო ინდუსტრიაში ცნობილი, როგორც KeyVisual), არის კომუნიკაციის საშუალება, რომელიც ერთი კომპოზიციით მოგვითხრობს ბრენდის შესახებ.

გადავწყვიტე, „ჩიორას“ შესახებ მისივე საცხოვრებლით მეამბო.

კრეატიულ პროცესში მებადებოდა კითხვები: „როგორია გულის ბუდე, რომელშიც ჩიორა ცხოვრობს?“, „იქნებ ჩიორა თავის ტანსაცმელს ქანდარაზე ფენს გასაშრობად?“ „რა მახასიათებლებით გამოირჩევა გულის ბუდე სხვა ბუდეებისგან?“

ასეთი აღმოჩენებით შეიქმნა, ასი პროცენტით ციფრული, ჩიორას ბუდე.

გულის ფორმის შესასვლელი
ჩიორას ტანსაცმელი
ფლუგერი ჩიორას გამოსახულებით
აივანი და საკუჭნაო
ვიზუალი
მოდელი

შეფუთვა

პროდუქტების შეფუთვაში (ჩანთა და ყუთი) ილუსტრაციულ როლს ირგებს ჩიორას ლოგო. ჩანთისა და სხვა პროდუქტების ზედაპირზე გამოყენებულია ბრენდისთვის შემუშავებული სპეციალური პატერნი, რომლის ინსპირაციის წყაროც ჩიტების ბუმბულთა განლაგების კანონზომიერება იყო.

სავიზიტო ბარათები

დოკუმენტები

იარლიყები

ტეგები

გაზიარება

Share on facebook
Share on twitter
Share on pinterest
Share on linkedin

მზად ხართ სასაუბროდ?

თუ გსურთ კითხვების დასმა, კონსულტაცია ან პროექტის შეკვეთა, ისარგებლეთ საკონტაქტო ფორმით.